剛出來工作沒幾天，我就覺得無比痛苦，原來工作和我想像的，距離是這麼遠。
「明明我係 Editor，點解我做嚟做去都係 Report、Admin 嘢？」
我自知不是甚麼曠世奇才，但每日做的是數數一疊卡有多少張、釘裝文件、落街買下午茶……工作只是寥寥數日，已經足以令我叫苦連天。
未必太委屈了吧，我心想。
當你長期保持這個想法，臉上自然不會有甚麼好的表情，我想當時的我每日大概總是黑口黑面，滿臉不耐煩的模樣。
旁邊的資深同事 May 見狀，就湊過來問我，「做得好唔開心？」
「呢度啲嘢都唔係我想做。」我對她說，「我覺得呢度唔太適合我。」
當時我並不知道對同事透露去意是大忌，所幸 May 都沒有說甚麼，只是微笑問我：「咁你頭幾日返工想比你負責啲咩？唔通一嚟就比個頭版你跟咩？」
我無言以對，但仍不服氣，「就算唔係孭飛嗰個，都起碼做啲有關係嘅嘢，依家做嘅嘢根本學唔到嘢！」
May 嘆了口氣，「阿仔你啱啱出嚟做嘢，你未必咁快體會到。如果樣樣嘢你都係想做，一係你真係好好彩，一係你就做緊老細。」
我知道她在這個行業打滾了很長時間，就問她「咁你係咪好鍾意返工？」
「痴 L 線，邊有人鍾意返工。」她哈哈大笑，「不過起碼呢份工我都 Enjoy 嘅。」
我和她都是編輯，但她處理文字工作以外的東西比我還要多十倍，「你做咁多其他嘢都 Enjoy 咩？」
「無辦法，做嘢唔會係你每個 Task 都想做。」她攤了攤手，「唔通老細叫你做，你同佢講『呢單嘢唔係我跟開』咩？咪自己哽咗佢。無理由因為一啲小小嘅唔想做，放棄咗自己鍾意做嘅部分。有時為咗目標，係需要妥協、忍耐。」
我聽完之後會感動得莫名其妙……別傻了，這只有出現在電視劇或勵志電影中，我當時只有一個想法。
就是這個人奴性好重，大概是黎生的朋友。
沒多久，我就離開了那份工作，May 的說話我更是轉眼間就忘記了。
直至人慢慢大了，換了幾份工作，我才開始領會到她的說話。
就算是你的 Dream Job， 總有些地方還是要委屈一下，你才可以真正做到你想做的事，並不會一星期 5 天、每天 8 個小時你都能歡歡喜喜地工作。總有一些令你難以下咽的地方，又或者你不想做的工作，你可以做的就是 Quit，又或者是頂硬上。
但如果每份工作都 Quit，大概不用一年就可以做遍全香港的公司（如果還有人請的話）。
這或許是一種妥協，又或者是一種成長，人生不如事就是十常八九，我們不是每一件事都可以爭取到，有時候需要接受不完美，又或者先將自己的想法放下，去成就更大、更遠目標。
聽不明白？不要緊的，當時的我也聽不進去，但如果可以的話請在心理記下這句話，當你遇上類似情況，你會更容易接受那種不愉快的感覺。
➤ 延伸閱讀：【職場真相】今日30歲，我想重頭嚟過
遇到更多、更複雜的職場問題？
我們提供專業 Career Coach、Counsellor 幫你一對一解決各種職場疑難，以及改善職場心理健康。如果你有解不開的困難，又或者想尋求職場上的專業建議，可以到這裡預訂一對一職場服務，或者透過 2391 2928 或 info@dozenbase.com 聯絡我們！
